టైగర్ ష్రాఫ్‌పై కాల్పులు: 20 రోజులుగా ముంబైలో మకాం, ఫుట్‌బాల్ మైదానం వద్ద రెక్కీ

బాలీవుడ్ నటుడు టైగర్ ష్రాఫ్ ప్రయాణిస్తున్న కారుపై కాల్పుల ఘటనకు సంబంధించి పోలీసులు కీలక పురోగతి సాధించారు. ఈ కేసులో ముగ్గురు నిందితులను రాజస్థాన్‌లోని కోట రైల్వే స్టేషన్‌లో అరెస్ట్ చేశారు. దాడికి దాదాపు 20 రోజుల ముందే నిందితులు ముంబైకి చేరుకొని, పక్కా ప్రణాళికతో ఈ ఘాతుకానికి పాల్పడినట్లు పోలీసుల దర్యాప్తులో తేలింది. వారం రోజుల క్రితం టైగర్ ష్రాఫ్ ఆడుకుంటున్న ఫుట్‌బాల్ మైదానం వద్దకు వెళ్లి రెక్కీ కూడా నిర్వహించినట్లు గుర్తించారు.

అరెస్టయిన వారిలో హర్యానాకు చెందిన ఫుల్‌సింగ్ నరేశ్, రెహాన్ రషీద్దీన్‌తో పాటు ముంబైలో నివసిస్తున్న హృతిక్ అనే రాపిడో డ్రైవర్ ఉన్నారు. వీరిలో హృతిక్ బైక్ నడపగా, మిగిలిన ఇద్దరు కాల్పులు జరిపినట్లు పోలీసులు తెలిపారు. సెప్టెంబర్ 11న వీరు ఒక మోటార్‌సైకిల్‌ను కొనుగోలు చేసినట్లు కూడా విచారణలో వెల్లడైంది.

కాల్పుల అనంతరం పోలీసులను తప్పుదోవ పట్టించేందుకు నిందితులు వ్యూహాత్మకంగా వ్యవహరించారు. ముందుగా బైక్‌పై అంధేరీ రైల్వే స్టేషన్‌కు వెళ్లి, అక్కడి నుంచి లోకల్ ట్రైన్‌లో కాందివలీకి చేరుకున్నారు. ఆ తర్వాత క్యాబ్ బుక్ చేసుకొని సూరత్‌కు పారిపోయారు. అక్కడి నుంచి కోటా వెళుతున్న పుణే-జైపూర్ ఎక్స్‌ప్రెస్ రైలు ఎక్కగా, పక్కా సమాచారంతో కోటా పోలీసులు వారిని అదుపులోకి తీసుకున్నారు. కోటా ఎస్పీ తేజస్విని గౌతమ్ ప్రకారం, కేవలం 15 నిమిషాల్లో ఆపరేషన్ పూర్తి చేసి నిందితులను పట్టుకున్నారు. తొలుత ఢిల్లీ వెళ్లి, అక్కడి నుంచి నేపాల్‌కు పారిపోవాలని నిందితులు పథకం రచించినట్లు ప్రాథమిక విచారణలో తెలిసింది.

నిందితుల్లో ఒకడైన రెహాన్‌కు, లారెన్స్ బిష్ణోయ్ గ్యాంగ్‌తో సంబంధాలున్న అనిల్ పండిట్‌తో పరిచయం ఉన్నట్లు పోలీసులు అనుమానిస్తున్నారు. ఈ కోణంలోనూ దర్యాప్తు ముమ్మరం చేశారు. నిందితుల నుంచి ఒక మొబైల్ ఫోన్‌ను స్వాధీనం చేసుకున్నారు. అయితే, కాల్పులకు ఉపయోగించిన ఆయుధాన్ని ఇంకా గుర్తించాల్సి ఉంది.

గత ఆదివారం రాత్రి 7 గంటల సమయంలో ముంబైలోని జుహూ ప్రాంతంలో టైగర్ ష్రాఫ్ ఫుట్‌బాల్ మైదానం నుంచి తిరిగి వస్తుండగా ఈ దాడి జరిగింది. ఈ ఘటనలో టైగర్ ష్రాఫ్ స్వల్ప గాయాలతో బయటపడగా, డ్రైవర్ సహా మరొకరు గాయపడ్డారు. నిందితులను కస్టడీలోకి తీసుకునేందుకు ముంబై పోలీసుల బృందం కోటాకు చేరుకుంది. దాడి వెనుక అసలు కారణాలు తెలుసుకునేందుకు విచారణ కొనసాగుతోంది.